Мұхамеджан Тынышбайұлы атындағы Жетісу облыстық тарихи-өлкетану музейінде ерекше мәдени шара өтті. Тағылымды жиынға Жетісу университетінің «Журналистика» мамандығының 2-курс студенттері қатысып, рухани әсерге бөленді. Ақын Бақтыбай Жолбарысұлының 190 жылдық мерейтойы аясында ұйымдастырылған шарада «Жидебай-Бөрілі» мемлекеттік тарихи-мәдени және әдеби мемориалдық музей-қорығының Әсет Найманбайұлы әдеби музейі бөлімі әзірлеген «Аты алты Алашқа танымал ақын — Әсет» атты жылжымалы көрменің ашылу салтанаты өтті. Көрмеде халық арасында кеңінен танымал әнші-композитор, айтыскер ақын Әсет Найманбайұлының өмірі мен өнер жолынан сыр шертетін құнды деректер мен жәдігерлер қойылды. Экспозициядан ақынның өзі және отбасы пайдаланған әмиян, жез леген, шақша, шойын құмған сынды тұрмыстық бұйымдар ұсынылып, өткен ғасырдың тыныс-тіршілігінен мол мағлұмат берді. «Журналистика» мамандығының студенттері тарихи жәдігерлерге қызығушылық танытып, өздері үшін тың деректер алды. «Әсеттің өмір жолымен жақынырақ танысып, оның қазақ өнеріне қосқан үлесін сезіндік. Бұл бізге үлкен шабыт берді», — деп әсерлерімен бөлісті.
