2025 жылдың 28 қазан – 11 қараша аралығында ҚР ҒжЖБМ ҒК қаржыландыратын ЖТН AP26197965 «Посткеңестік Қазақстандағы этникалық репатрианттардың күнделікті өмірі: бейімделу стратегиялары мен интеграциялық тәжірибелері (Жетісу облысының мысалында)» ғылыми жобасы аясында Қаратал, Ескелді аудандарында және Текелі қаласында далалық этнографиялық зерттеулер жүргізілді. Зерттеу жұмыстарына жоба жетекшісі, Тарих және әлеуметтік-гуманитарлық пәндер кафедрасының қауымдастырылған профессоры Байғабатова Н.Қ., оқытушы-дәріскерлері Абдрахим М.Е. және Енсеева В.Т., қазақ тілі мен әдебиеті кафедрасының қауымдастырылған профессорының м.а. Абызова А.М. қатысты.
Далалық зерттеу жұмыстары барысында зерттеу тобының мүшелері аталған аудандарда тұрып жатқан Қытай, Моңғолия және Өзбекстаннан келген репатриант азаматтармен сұхбаттар жүргізіп, олардың көші-қон тарихы, тұрмыс-тіршілігі және бейімделу тәжірибелері жөнінде тереңдетілген интервьюлер алды. Сонымен қатар жергілікті әкімдіктердің ішкі саясат бөлімдеріндегі жауапты мамандармен репатрианттардың әлеуметтік интеграциясына қатысты сұхбаттар ұйымдастырылды. Аталған жұмыстар нәтижесінде жобаның эмпирикалық негізін құрайтын маңызды материалдар жинақталды.
