27 ақпан күні Қазақ тілі мен әдебиеті кафедрасының диссертанты Е.Т. Саржігітовтың философия докторы (PhD) дәрежесін алу үшін дайындалған «Жыраулар поэзиясының поэтикасы және оны жоғары оқу орындарында оқыту әдістемесі» атты диссертациялық жұмысына қатысты ғылыми семинар өтті. Ғылыми семинар барысында ізденуші зерттеу жұмысының өзектілігін, мақсаты мен міндеттерін, ғылыми жаңалығы мен теориялық және практикалық маңызын жан-жақты баяндады. Диссертацияда жыраулар поэзиясының поэтикалық табиғаты, көркемдік-стильдік ерекшеліктері, жанрлық жүйесі терең талданып, оны жоғары оқу орындарында оқытудың тиімді әдіс-тәсілдері ұсынылды. Сонымен қатар, зерттеу жұмысында дәстүрлі жыраулық мұраның қазіргі әдебиеттану ғылымындағы орны айқындалып, білім беру үдерісінде қолданудың ғылыми-әдістемелік негіздері жүйеленді. Семинарға кафедраның профессор-оқытушылары, жас ғалымдар мен докторанттар қатысып, диссертацияның мазмұнына қатысты өз пікірлерін білдірді. Ғалымдар зерттеу жұмысының ғылыми деңгейін саралап, бірқатар ұсыныстар мен тұжырымдарын ортаға салды. Ғылыми басқосу мазмұнды пікір алмасуға ұласып, отандық әдебиеттану ғылымы мен жоғары білім беру жүйесіндегі өзекті мәселелерді талқылауға мүмкіндік берді.
