ЖТН AP27510879 «Кекіренің жойылып бара жатқан түрлерін зерттеу және биотехнология әдістерімен сақтау» жобасы аясында жоба жетекшісі Карашолакова Лаззат Наушабаевна 2026 жылғы 10-14 маусым аралығында сирек кездесетін және эндем өсімдіктердің өсімдік материалын іздеу және жинау мақсатында Алматы облысына, Алматы қаласына іссапарға жіберілді.
Экспедицияның мақсаты мен міндеттері:
- Кекіренің сирек және эндем түрлерінің популяцияларын іздеу және гербарий материалын жинау.
- In vitro культурасына енгізу үшін өсімдік материалын жинау.
- Өсімдік бөліктеріне фитохимиялық зерттеу жүргізу үшін өсімдік материалын жинау.
- Әртүрлі температурада тұқым коллекциясын құру үшін үлгілер жинау.
Экспедиция қорытындысы бойынша Кіші Алматы шатқалындағы Сары-Сай шатқалында, Кіші Алматы өзенінің оң жағалауының оңтүстік-батыс және солтүстік-батыс экспозициялы беткейлерінен алматылық кекіренің 2-ші популяциясы табылды. Одан әрі зерттеулер үшін өсімдік материалы жиналды.
Сондай-ақ, 2025 жылы Іле Алатауының Үлкен Алматы шатқалында, Күмбелсу өзенінің Үлкен Алматы өзеніне құйылысында табылған алматылық кекіренің 1-ші популяциясынан өсімдік материалы жиналды.
Осылайша, экспедиция барысында алматылық кекіре популяциясы сәтті анықталды, қажетті өсімдік материалы қойылған міндеттерге сәйкес жиналды.
Далалық зерттеудің барлық мақсаттары мен міндеттері толық көлемде орындалды, бұл жоба аясында зертханалық және биотехнологиялық жұмыстарды әрі қарай жүргізуге мүмкіндік береді.









