27.04.2026 күні І.Жансүгіров атындағы ЖУ бас ғимаратыының 221 дәрісханасында «Мемлекеттік тілдің әлеуеті және көптілді қоғамда тілдік тұлға қалыптастыру» тақырыбындағы ғылыми баяндамасын Қазақ тілі мен әдебиеті кафедрасының қауымдастырылған профессоры Шыныбекова Айжан Сахановна оқыды. Аталған ғылыми семинарға Гуманитарлық факультеті «ҚТӘ-311», «ҚТӘ-312» топтарының білімгерлері белсенді түрде қатысты. «Мемлекеттік тілдің әлеуеті және көптілді қоғамда тілдік тұлға қалыптастыру» тақырыбында өткен семинар жоғары деңгейде ұйымдастырылып, мазмұнды пікір алмасуға ұласты. Іс-шараның негізгі мақсаты – мемлекеттік тілдің қоғамдағы рөлін арттыру, оны күнделікті өмірде қолдану аясын кеңейту және тілдік тұлғаны қалыптастыру мәселелерін талқылау болды. Ғылыми семинар барысында қатысушы студенттер тіл мәдениеті, сөз құндылығы, мемлекеттік тілдің мәртебесі туралы ой қозғап, өз пікірлерімен бөлісті. Сонымен қатар, тілдік тұлға қалыптастыруда отбасы, білім беру жүйесі және қоғамның ықпалы ерекше екені атап өтілді. Іс-шарада презентация көрсетіліп, баяндама тыңдалып, практикалық ұсыныстар берілді. Баяндамашы мемлекеттік тілді дамытуға бағытталған жаңа идеялар ұсынып, оны жүзеге асыру жолдарын талқылады. Семинар соңында белсенді қатысушыларға алғыс білдіріліп, мұндай кездесулердің маңыздылығы ерекше атап өтілді.
