2026 жылғы 19 қазан мен 8 желтоқсан аралығында виртуалды академиялық ұтқырлық бағдарламасы аясында Ресей Федерациясының Челябинск қаласындағы «Оңтүстік Орал мемлекеттік университеті» жоғары білім берудің федералдық мемлекеттік автономды білім беру мекемесінің доценті, педагогика ғылымдарының кандидаты А. И. Федоров магистранттарға онлайн сабақтар өткізуде.
Сабақтар:
«Әлемдік деңгейдегі спортшыларды даярлау: әдіснама, әдістер және инновациялар»;
«Жаттығу үдерісінің тиімділігін қамтамасыз етудің техникалық құралдары» оқу курстары бойынша ұйымдастырылуда.
Оқу барысында әлемдік деңгейдегі спортшыларды даярлаудың заманауи жүйелері мен тұжырымдамалары таныстырылып, спорттық даярлықтың негізгі бағыттарына сипаттама берілуде. Сонымен қатар, спортшыларды көпжылдық даярлаудың әртүрлі кезеңдеріндегі оқу-жаттығу үдерісін ұйымдастырудың теориялық және әдістемелік тәсілдері қарастырылуда.
Магистранттар спорттағы кешенді бақылау мен басқару жүйесімен, сондай-ақ оқу-жаттығу үдерісінің тиімділігін арттыруға ықпал ететін заманауи ақпараттық технологиялармен және техникалық құралдармен танысуда. Оқу курсының материалдарына қол жеткізу дене шынықтыру және спорт мамандандырылған сайты түрінде орындалған цифрлық білім беру ресурстарының көмегімен қамтамасыз етіледі (https://taplink.cc/physicalculture). Виртуалды академиялық ұтқырлық бағдарламасы магистранттардың кәсіби білімін тереңдетуге, халықаралық тәжірибені меңгеруіне және заманауи оқыту технологияларын игеруіне мүмкіндік береді.
