Журналистика кафедрасының профессор-оқытушылар құрамы ұйымдастырған оқу-әдістемелік семинарлар мен тренингтер өтті. Филология ғылымдарының кандидаты К.Н. Мысаева — әл-Фараби атындағы Қазақ ұлттық университетінің журналистика кафедрасының өкілі — журналистика және ақпараттық білім беру бағыттарының студенттерімен бірлесе отырып, С. Аманжолов атындағы Шығыс Қазақстан университеті, әл-Фараби атындағы Қазақ ұлттық университеті және І. Жансүгіров атындағы Жетісу университетінің студенттері үшін «БАҚ-тағы өшпенділік тілі» тақырыбында онлайн-дәріс өткізді.

     Үш жоғары оқу орнының студенттеріне арналған бұл іс-шараның негізгі мақсаты — өшпенділік тілі ұғымы, оның түрлері мен жіктелуі туралы кеңінен ақпарат беру болды. Студенттер медиажурналистика бойынша өткен мастер-класты аяқтағаны туралы сертификаттарға ие болды.

     Президент Қасым-Жомарт Тоқаев халыққа Жолдауында «Жаңа Қазақстанды» құрудың бірнеше кезеңі туралы баяндады. Ілияс Жансүгіров атындағы Жетісу университетінің «Журналистика және ақпарат» білім беру бағдарламалары бойынша 2-курс студенттері (ЖК211, ЖК212, ЖПК211) Президенттің Жолдауын жан-жақты талқылады. Негізгі құжатта саяси реформаларды жүзеге асырудың әлемдік үлгісіне сүйене отырып, олар президенттің және оның жақын туыстарының өкілеттіктеріне қатысты нормаларды Конституцияда бекіту жөніндегі жаңа бастаманы қолдайтындықтарын білдірді.

     2025 жылғы 12 сәуірде Ілияс Жансүгіров атындағы Жетісу университетінің Басқарма төрағасы, ректор Е.Бурибаев журналистика мамандығының 4-курс студенті Гүлнұр Баймұханға ғылымға қосқан үлесі үшін Алғыс хатын табыстады. Ғылыми жетекшісі Бибігүл Жұмашқызы Кәрімова. 

     2025 жылғы 24 қыркүйекте Еңбек күні қарсаңында Жетісу облысында түрлі сала мамандарына ерекше құрмет көрсетілді. «Еңбек жолы» және «Парыз» байқауларының облыстық кезеңінің жеңімпаздары марапатталды. Олардың қатарында Ілияс Жансүгіров атындағы Жетісу университетінің журналистика кафедрасының 4-курс студенті Элмира Берікқызы Смағұлова да бар. Ол ақпарат саласын дамытуға қосқан үлесі үшін алғыс хат пен 100 мың теңге көлеміндегі сертификатқа ие болды. Марапатты Жетісу облысы әкімінің орынбасары Марлен Көлбаев табыстады.

     Журналистика кафедрасы «Академиялық» олимпиада ұйымдастырды. Жарысқа «Журналистика» және «Қоғаммен байланыс» мамандықтары бойынша 2–4 курс студенттері қатысты.

     Олимпиада үш кезеңнен тұрды. Бірінші кезеңде студенттер өздерін шығармашылық тұрғыда таныстырды. Екінші кезеңде журналистика бағыты бойынша білім алатын студенттер бір сағат ішінде «Қоғамның өзекті мәселесі» тақырыбында эссе жазды. Ал қоғаммен байланыс мамандығында оқитын студенттер түрлі компанияларға дағдарысты сәтті еңсеруге көмектесетін стратегияларды жан-жақты баяндады. Қорытынды кезеңде, үй тапсырмасына сәйкес журналистика мамандығының студенттері ұзақтығы 1–3 минут аралығындағы «Журналист күні» тақырыбында бейнеролик түсірді. Ал қоғаммен байланыс мамандығы студенттері «Қоғаммен байланыс маманы күні» тақырыбында фоторепортаж дайындап, таныстырды.

     Байқау нәтижесі бойынша, «Журналистика» номинациясында І орынды Шырын Асқатқызы, ІІ орынды Азамат Дәулетбаев пен Айдана Ардақызы, ал ІІІ орынды Оспанұл Аружан, Балааман Қадірсейт және Ақбота Мұратқызы өзара бөлісті. «Қоғаммен байланыс» мамандығы бойынша І орынды Томирис Айсаева, ІІ орынды Дариға Мелисканова мен Асылжан Тоқсанбаева бөлісті. ІІІ орынға Өмірбек Нұрай, Әшим Томирис және Нұрсұлтан Тоқтасын ие болды.

     Іс-шараның басты мақсаты — студенттердің кәсіби дамуына ықпал ету, олардың шығармашылық көкжиегін кеңейту және болашақ журналистердің өзіндік ерекше стилін қалыптастыруға көмектесу. Жеңімпаз атанған студенттер алдағы ұлттық олимпиадаға қатысады.

     Көрнекті ғалым, әдебиеттанушы әрі қоғам қайраткері Темірбек Қожакеевтің туғанына 100 жыл толуына орай, Ілияс Жансүгіров атындағы Жетісу университетінде «Қожакеев әлемі» атты республикалық байқау ұйымдастырылды. Рухани-танымдық мәні жоғары бұл шара жас зерттеушілер мен шығармашыл жастардың ғылыми ізденісіне серпін беруді мақсат етті. Zoom және офлайн форматындағы шараға ғалым-ұстаздың әріптестері, еліміздің жетекші ЖОО-да еңбек етіп жүрген шәкірттері мен жас журналистер қатысты. Сөз алғандар темірдей тәртіп иесі мен талапшыл ұстаз болмысын, ерен еңбектерін жарыса айтып, жастарға әр қырынан таныстырды.

     Республикалық деңгейде өткен байқауға еліміздің 7 жоғары оқу орнынан 40 шақты білімгер қатысып, Темірбек Қожакеевтің ғылыми мұрасы, публицистикалық еңбектері мен шығармашылық көзқарасын терең зерделей отырып, үш бағыт бойынша өзара бақ сынады. Қатысушылар өз баяндамалары мен зерттеу жұмыстары арқылы тұлғаның қазақ журналистикасы мен әдеби сынының дамуына қосқан үлесін жан-жақты ашып көрсетті.

     Байқаудың қорытынды кезеңі 2026 жылғы 30 қаңтарда өтіп, нәтижелері ғылыми-тәжірибелік конференцияда жарияланды. Байқау қорытындысы бойынша, «Ең үздік ғылыми жоба» аталымы бойынша I-орын әл-Фараби атындағы Қазақ ұлттық университетінің студенті Мадина Мәдіге бұйырса, «Ең үздік баспасөз материалы»  бойынша I-орын  Л.Гумилев атындағы Еуразия ұлттық университетінің білімгері Мерей Амангелдіге табысталды. «Ең үздік видео материалы» номинациясының жеңімпазы Жетісу университетінің 3-курс студенті Бейсенбек Айбек.

     Аталған іс-шара  Темірбек Қожакеевтің мол мұрасын жас буынға насихаттауға және ұлттық ғылым мен руханиятты дамытуға бағытталған маңызды алаңға айналды.